الأربعاء، 29 أبريل 2009

لماذا الخوف ؟؟؟


نخاف ليه من المستقبل ؟؟

ليه دايما بنخاف من المستقبل ؟؟ ليه دايما بنفكر فيه و شايلين هم كبير
ليه بتظبط نفسك فجأه و إنت قاعد سرحان في كتاب أو قدام الكمبيوتر مش شايف اللي قدامك .. سرحان بتفكر ..
و أحيانا تظبط علي وشك تكشيره .. أو نظرة حزن أو نظرة خوف باينه في عنيك ...

ليه أحيانا تقوم الصبح قلقان و تعبان و شايل هموم كتير ...
و تبص في المرايه تلاقي عنيك فيها بحر من القلق و الحزن ..


ليه أحيانا تحس بإنك متضايق ، بتفكر كتيييييير
شايل الهم و فاقد الأمل في أي حاجه حلوه في الحياه
ليه كل ده ؟؟


بص حواليك .. شوف حياتك أد إيه حلوه
شوف أد إيه ربنا أنعم عليك بنعم ملهاش عدد و لا حصر ..

بص حواليك .. شوف ربنا أنعم عليك بإيه و إيه و إيه
هاتلاقي حاجات مالهاش نهايه

و بص حواليك تاني .. و قول لنفسك ياااااااااااااااه أنا كنت فييييين و بقيت فييييييين
سبحان الله
مش اللي إنت فيه النهارده كان جزء و لو بسيط من أحلامك إمبارح و أول ؟؟
مش اللي إنت فيه النهارده كان جزء من خيال تخيلته زمان و إنت صغير و ماكنتش عارف يا تري هايتحقق في يوم من الأيام و لا لأ ..

شفت ...
شفت ربنا سبحانه و تعالي كريم معانا أد إيه و رحيم بينا أد إيه ؟؟
سبحان الله .. أرحم الراحمين
حقق لك كتيييييير من الأحلام اللي ماكنتش إنت نفسك تتخيل إنها تتحقق
و عايش في واقع النهارده تقدر تلمسه بإيديك كان مجرد خيالات بتمر في رأسك إمبارح و تقول يارب يارب ممكن ده يحصل ...
و أهو حصل
و ربنا سبحانه و تعالي ما تأخرش عنك و لا عن غيرك في حاجه أبدا
سبحان الله .. أرحم الراحمين


يبقي ليه نقلق .. ليه نخاف و نشيل هم أكبر مننا
ليه و إحنا عندنا رب - سبحانه و تعالي - رحيم بينا أوي و قادر علي كل شئ
يــــــا ربي .... لا إله إلا أنت سبحانك إني كنت من الظالمين

إرمي حمولك علي الله دايما
زي مارميتها قبل كده و لم يخذلك - سبحانه و تعالي -

إفتكر دايما المعني الجميل اللي محدش فينا يقدر يعيش من غيره أبدا ...

معني التوكـــــــــــــــــــــــــــــــــــــل

التوكل علي الله سبحانه و تعالي
(( حسبي الله لا إله إلا هو .. عليه توكلـــــــــــــــــــــــت و هو رب العرش العظيم ))

و إفتكر كمان لما أحد الصحابه ذهب للرسول صلي الله عليه و سلم يشكو إليه ضيقه و همه
فنصحه الحبيب عليه صلوات الله و سلامه بأن يردد دائما ..
(( لا إله إلا أنت سبحانك .. إني كنت من الظالمين ))


يارب ..
اللهم عليك توكلنا و إليك أنبنا و إليك المصير
اللهم إهدنا و وفقنا و أصلح أحوالنا يارب العالمين
اللهم إرزقنا الإخلاص و التوفيق في كل قول و عمل
اللهم إجعل عمرنا كله و عملنا كله خالصا لوجهك يا أكرم الأكرمين
و إرض عنا و إرحمنا و أبائنا و أمهاتنا و إخواننا يارب يا أرحم الراحمين
اللهم آمين ....


فك التكشيره اللي علي وشك دي :)
و إبتسم
و بص حواليك
و بص للواقع اللي إنت عايشه
و إفتكر أحلامك الحلوه و طموحاتك و رغبتك إنك تغير العالم كله
و حس إنك سعيد إن ربنا سبحانه و تعالي إختارك هنا و حطك إنت في المكان ده لحكمه عنده
و حس بربنا سبحانه و تعالي و رحمته بيك في كل لحظه ....
و قول لنفسك .. (( يلّا .. عندنا شغل كتير النهارده )) :)

و آخر حاجه ..
قول ..

يــــــــــــــــــــــــــــــــــــــــارب




هاااا .. فكيت التكشيره؟ (;

الاثنين، 27 أبريل 2009

سينــــــــــــــــــــــــــــــاء

السلام عليكم

بقالي كتير لم أكتب في مدونتي شيئا جديدا بالرغم من إن الفتره الماضيه مررت بمواقف و أحداث و تعاملت مع أشخاص و إكتسبت خبرات تستحق كتابا بأكمله :)

عموما , اللي خلاني أفكر أكتب الموضوع ده .. من يومين كنت بتفرج علي التليفزيون - و دي حاجه بطلت أعملها من مده لأن التليفزيون أصبح مستفز لدرجه لا تحتمل - و بمناسبة تحرير سيناء الناس إفتكرت سيناء أخيرا بفيلم بيتكلم عنها ..

المهم .. علي عكس ما معظم الناس ممكن تتصور الفيلم ماكانش محاضره تاريخيه من النوع اللي يخللي الناس تقلب القناه فورا ،
و بالعكس أنا سمعت حاجات و شفت حاجات عن سيناء الحبيبه ماكنتش أعرفها قبل كده إطلاقا ....

طول عمري بحب سيناء أوي و بحس إنها من أجمل ما خلق ربنا سبحانه و تعالي، و طول عمري عندي حلم إني أزور سيناء .. مش سيناء القري السياحيه و المطاعم ، لأ ..
سيناء الطبيعه و البحر و الصحراء و الجبال ...

و قبل ما تفتكروا إني داخله اكتب محاضره وطنيه في تاريخ مصر ،
لكن فعلا سيناء دي حاجه جميله أوي .. و إحنا مقصرين في حقها تماما

سيناء مش بس غاليه علينا ، دي أغلي قطعة أرض في العالم ،
و بعيدا عن العواطف .. هي فعلا بتحتل موقع إستراتيجي شديد الأهميه علي خريطة العالم
و بتسيطر علي محاور رئيسيه في حركة النقل البحري علي مستوي العالم برضه ....








و غير موقعها الفريد ... سيناء فيها كم من الثروات الطبيعيه لا يقدر بثمن ..
و لو كانت سيناء دي جزء من دوله تانيه كانت بلا شك البلد دي حولتها لمنجم ذهب لا ينضب ...






اللي شفته و سمعته عن سيناء خلاني أسأل نفسي .. ياتري إحنا معلوماتنا إيه عن سيناء ؟؟
للأسف معظم الشعب المصري لا يعرف عن سيناء أكثر من المنتجعات السياحيه التي لا يجرؤ أكثر من 98 في الميه من المصريين علي الذهاب إليها ...
و دي حقيقه مع الأسف و غلطه مهوووووله إننا نخللي سيناء قاصره علي السائحين و الأغنياء فقط ..





طيب يا تري إحنا فكرنا قبل كده نستغل سيناء إزاي الإستغلال الصح ؟؟
إزاي نستفيد من إمكانياتها المهوله و إحنا بلد في أمس الحاجه لكل مورد جديد ؟؟؟


طيب المعلومه اللي توقفت عندها كتيييييير ....
كام حد مننا يعرف إن سيناء تحتل أكثر من 22 في الميه من مساحة مصر ؟؟؟؟
يعني سيناء تقترب من ربع مساحة مصر تقريبا ..


و مع ذلك ، تفتكروا عدد سكانها كام ؟؟؟


450 ألف نسمه !!!!!!!!!!

مع العلم إن سكان القاهره فقط ......
20 مليووووووووووون بني أدم !!!!!
يعني سكان سيناء كلها أقل من سكان مدينة نصر لوحدها مثلا ..
حد يصدق الكلام ده !!



الفكره اللي أنا عايزه أطرحها عليكم هنا مش فكرة سيناء لوحدها ... هي مشكلة بلد بشكل عام
مشكلة ناس مش بتعرف تفكر صح و تستغل إمكانياتها صح

ليه النعمه بتيقي في إيدينا و العالم كله بيتصارع حوالينا عشان ياخدها و إحنا أقل الناس تقديرا للنعمه و الكنوز دي ؟؟

صحيح المفروض علي المستوي الرسمي يكون في إتجاه قومي لتنمية و تعمير سيناء و تحويلها لقري و مدن قابله للحياه في المستوي اللي معظم المصريين يقدروا عليه ..

ليه ما نستغلش أرض زي سيناء في حل مشكله معقده زي مشكلة زحام القاهره و الدلتا اللي كل يوم بيزيد عن اللي قبله

ليه ما تكونش سيناء فيها متنفس للمصريين العاديين اللي بيمثلوا أغلب الشعب المصري عشان يروحوا يقضوا أجازات هناك و يبقي في سياحه داخليه جوه بلدنا - و لا هي سيناء دي للأجانب و بس - ....

إيه المانع إن يكون في مشروعات لشباب الخريجين اللي مش لاقيين فرص عمل كريمه ، يشتغلوا فيها ..
يبنوا مستقبلهم و في نفس الوقت يعمروا بلدهم


و الفكره اللي مطروحه من سنوات .. فكرة تمليك الأراضي لشباب الخريجين بحيث يستصلحوها و يتملكوها

الأفكار دي كلها إيه المانع من تنفيذها ...


حاجتنا لتنمية و تطوير سيناء حاجه ماسه و شديدة الأهميه
أولا من الناحيه الأمنيه ، الأرض الفارغه تغري بإحتلالها ، و إحنا علي حدودنا أكبر كيان إستعماري في التاريخ
و ما يحدث في سيناء حاليا و علي حدودها الشرقيه أكبر دليل علي كلامي ..
ثانيا من الناحيه الإقتصاديه ، إحنا بلد عايزه تنميه و نهضه ، و في إيدينا ثروه ربنا سبحانه و تعالي منحها لينا ، يبقي أقل ما يجب فعله هو حسن إستغلال النعمه دي ...

أتمني إني أشوف سيناء بجد منوره علي خريطة مصر ، و أتمني إني أحقق حلمي فيها ..

السلام عليكم