أولا انا من عشاق الاغنيه الوطنيه ...
و حقيقي بحب أوي الاغنيات اللي بتلمس معاني راقيه و جميله جوانا ...
بجد بجد من أجمل الأغنيات اللي حقيقي لما بسمعها بتلمس حاجه جميله اوي جوايا .. هي الأغنيه دي
بحب كلماتها و لحنها و المعني الجميل اللي فيها ..
لو بتحبوا البلد دي .. خللي عيونكم عليها
بلدي كريمه و أصيله ... لو دق أبوابها مين
الأغنيات دي بتخلليني أسأل نفسي سؤال ..
ياتري المصريين حبهم لبلدهم قل فعلا ؟؟
يا تري الظروف الصعبه اللي معظم المصريين عايشينها أثرت علي إحساسهم بالحب و الإنتماء لمصر فعلا ؟؟
أعتقد إنه للأسف كتير من الناس بيختلط عندها كراهيتها للحكومه أو غضبها من الظروف السيئه أو عدم رضاها عن مليون حاجه سلبيه بنعيشها للأسف وبقت جزء من مجتمعنا .. كل ده بيختلط للأسف مع حبنا و إنتمائنا للبلد و بيأثر عليه ...
الناس اللي شايفه الصوره سوده مافيهاش أي أمل .. و مش شايفه أي فايده من أي حاجه كويسه ..
أنا ممكن أتفق مع الناس دي إن فعلا في سلبيات كتير و حاجات كتير أوي محتاجه تتصلح
و إننا فعلا إتأخرنا كتييييييير أوي و العالم سبقنا بمراحل ..
لكن اللي أنا مقتنعه بيه كمان إن الكلام مش هو الحل .. و إن لعبة إنتقاد كل الناس إلا نفسي عمرها ما هاتجيب نتيجه في إصلاح اللي إحنا معترضين عليه ..
و إننا كلنا مسئولين مسئوليه كامله عن إصلاح اللي مش عاجبنا و اللي معترضين عليه ..
عموما الأغنيه أنا جبتها ليكم هنا ..
عيشوا معاها شويه و قولولي ايه رأيكم :) :)
ليست هناك تعليقات:
إرسال تعليق